Gefundene Einträge
Buch | Kapitel | Vers | Text |
1 Mose | 3 | 20 | כ ויקרא האדם שם אשתו חוה כי הוא היתה אם כל חי |
1 Mose | 3 | 21 | כא ויעש יהוה אלהים לאדם ולאשתו כתנות עור--וילבשם {פ} |
1 Mose | 3 | 22 | כב ויאמר יהוה אלהים הן האדם היה כאחד ממנו לדעת טוב ורע ועתה פן ישלח ידו ולקח גם מעץ החיים ואכל וחי לעלם |
1 Mose | 3 | 23 | כג וישלחהו יהוה אלהים מגן עדן--לעבד את האדמה אשר לקח משם |
1 Mose | 3 | 24 | כד ויגרש את האדם וישכן מקדם לגן עדן את הכרבים ואת להט החרב המתהפכת לשמר את דרך עץ החיים {ס} |
1 Mose | 4 | 1 | א והאדם ידע את חוה אשתו ותהר ותלד את קין ותאמר קניתי איש את יהוה |
1 Mose | 4 | 2 | ב ותסף ללדת את אחיו את הבל ויהי הבל רעה צאן וקין היה עבד אדמה |
1 Mose | 4 | 3 | ג ויהי מקץ ימים ויבא קין מפרי האדמה מנחה--ליהוה |
1 Mose | 4 | 4 | ד והבל הביא גם הוא מבכרות צאנו ומחלבהן וישע יהוה אל הבל ואל מנחתו |
1 Mose | 4 | 5 | ה ואל קין ואל מנחתו לא שעה ויחר לקין מאד ויפלו פניו |
1 Mose | 4 | 6 | ו ויאמר יהוה אל קין למה חרה לך ולמה נפלו פניך |
1 Mose | 4 | 7 | ז הלוא אם תיטיב שאת ואם לא תיטיב לפתח חטאת רבץ ואליך תשוקתו ואתה תמשל בו |
1 Mose | 4 | 8 | ח ויאמר קין אל הבל אחיו ויהי בהיותם בשדה ויקם קין אל הבל אחיו ויהרגהו |
1 Mose | 4 | 9 | ט ויאמר יהוה אל קין אי הבל אחיך ויאמר לא ידעתי השמר אחי אנכי |
1 Mose | 4 | 10 | י ויאמר מה עשית קול דמי אחיך צעקים אלי מן האדמה |