Gefundene Einträge
Buch | Kapitel | Vers | Text |
Matthaeus | 5 | 27 | [CA] hausideduþ þatei qiþan ist: ni horinos. |
Matthaeus | 5 | 28 | [CA] aþþan ik qiþa izwis, þatei hvazuh saei saihviþ qinon du luston izos, ju gahorinoda izai in hairtin seinamma. |
Matthaeus | 5 | 29 | [CA] iþ jabai augo þein þata taihswo marzjai þuk, usstagg ita jah wairp af þus; batizo ist auk þus ei fraqistnai ains liþiwe þeinaize, jah ni allata leik þein gadriusai in gaiainnan. |
Matthaeus | 5 | 30 | [CA] jah jabai taihswo þeina handus marzjai þuk, afmait þo jah wairp af þus; batizo ist auk þus ei fraqistnai ains liþiwe þeinaize, jah ni allata leik þein gadriusai in gaiainnan. |
Matthaeus | 5 | 31 | [CA] qiþanuh þan ist þatei hvazuh saei afletai qen, gibai izai afstassais bokos. |
Matthaeus | 5 | 32 | [CA] iþ ik qiþa izwis þatei hvazuh saei afletiþ qen seina, inuh fairina kalkinassaus, taujiþ þo horinon; jah sa ize afsatida liugaiþ, horinoþ. |
Matthaeus | 5 | 33 | [CA] aftra hausideduþ þatei qiþan ist þaim airizam: ni ufarswarais, iþ usgibais fraujin aiþans þeinans. |
Matthaeus | 5 | 34 | [CA] aþþan ik qiþa izwis ni swaran allis, ni bi himina, unte stols ist gudis; |
Matthaeus | 5 | 35 | [CA] nih bi airþai, unte fotubaurd ist fotiwe is; nih bi Iairusaulwmai, unte baurgs ist þis mikilins þiudanis; |
Matthaeus | 5 | 36 | [CA] nih bi haubida þeinamma swarais, unte ni magt ain tagl hveit aiþþau swart gataujan. |
Matthaeus | 5 | 37 | [CA] sijaiþ~þan waurd izwar: ja, ja; ne, ne; iþ þata managizo þaim us þamma ubilin ist. |
Matthaeus | 5 | 38 | [CA] hausideduþ þatei qiþan ist: augo und augin, jah tunþu und tunþau. |
Matthaeus | 5 | 39 | [CA] iþ ik qiþa izwis ni andstandan allis þamma unseljin; ak jabai hvas þuk stautai bi taihswon þeina kinnu, wandei imma jah þo anþara. |
Matthaeus | 5 | 40 | [CA] jah þamma wiljandin miþ þus staua jah paida þeina niman, aflet imma jah wastja. |
Matthaeus | 5 | 41 | [CA] jah jabai hvas þuk ananauþjai rasta aina, gaggais miþ imma twos. |