menu.png
Passwort vergessen ?

Kapitel Ansicht

 (Index)


•••► •••►
Vers Text
1 יש רעה אשר ראיתי תחת השמש ורבה היא על־האדם׃
2 איש אשר יתן־לו האלהים עשר ונכסים וכבוד ואיננו חסר לנפשו מכל אשר־יתאוה ולא־ישליטנו האלהים לאכל ממנו כי איש נכרי יאכלנו זה הבל וחלי רע הוא׃
3 אם־יוליד איש מאה ושנים רבות יחיה ורב שיהיו ימי־שניו ונפשו לא־תשבע מן־הטובה וגם־קבורה לא־היתה לו אמרתי טוב ממנו הנפל׃
4 כי־בהבל בא ובחשך ילך ובחשך שמו יכסה׃
5 גם־שמש לא־ראה ולא ידע נחת לזה מזה׃
6 ואלו חיה אלף שנים פעמים וטובה לא ראה הלא אל־מקום אחד הכל הולך׃
7 כל־עמל האדם לפיהו וגם־הנפש לא תמלא׃
8 כי מה־יותר לחכם מן־הכסיל מה־לעני יודע להלך נגד החיים׃
9 טוב מראה עינים מהלך־נפש גם־זה הבל ורעות רוח׃
10 מה־שהיה כבר נקרא שמו ונודע אשר־הוא אדם ולא־יוכל לדין עם [כ= שהתקיף] [ק= שתקיף] ממנו׃
11 כי יש־דברים הרבה מרבים הבל מה־יתר לאדם׃
12 כי מי־יודע מה־טוב לאדם בחיים מספר ימי־חיי הבלו ויעשם כצל אשר מי־יגיד לאדם מה־יהיה אחריו תחת השמש׃